✍️ RJ
“അമ്മയെ പറ്റി അനാവശ്യം പറഞ്ഞാൽ അരിഞ്ഞു തള്ളും നായെ നിന്നെ ഞാൻ…
ബിനോയിയുടെ അലർച്ചയിലും മുഖമടച്ചു വീണ അവന്റെ വലംകയ്യിന്റെ കരുത്തിലും ആകെ ഞെട്ടിവിറച്ചു നിന്നു പോയ് നവാസ്….
അച്ഛനില്ലാത്ത എന്നേം എന്റെ അനിയത്തില്ലയും എന്റെ അമ്മ കഷ്ടപ്പെട്ട് പണിയെടുത്തിട്ടാണ് വളർത്തിയത്… മുപ്പതു വയസു പോലും തികഞ്ഞിരുന്നില്ല അച്ഛൻ മരിക്കുമ്പോൾ അമ്മയ്ക്ക്…
വേറൊരു കല്യാണം കഴിക്കാൻ കുടുംബക്കാരും കൂട്ടുകാരും നിർബന്ധിച്ചപ്പോൾ പോലും ഞാനെന്റെ മക്കൾക്കു വേണ്ടി ജീവിച്ചോളാമെന്ന് പറഞ്ഞ എന്റെ അമ്മയാണോടാ ഈ നാൽപ്പത്തഞ്ചാം വയസ്സിൽ ബ്ലേഡ് ഗിരിയ്ക്ക് മുമ്പിൽ തുണിയു……..
ദേഷ്യത്തിൽ പറഞ്ഞവസാനമെത്തിയതും പറഞ്ഞു വന്നത്ത് തുടരാൻ കഴിയാതെ ശരീരമാകെ പാഞ്ഞൊരു വിറയലിൽ പാതിയായ് നിർത്തി ബിനോയ്…
ശക്തമായ് തന്റെ ഹൃദയമിടിക്കുന്നത് കാതോരമറിയുമ്പോൾ താൻ പറയാനൊരുങ്ങിയ വാക്കുകളിൽ കുടുങ്ങി പിടഞ്ഞവൻ
ബ്ലേഡ് ഗിരിയ്ക്ക് മുമ്പിൽ തന്റെ അമ്മ മാനം പണയം വെച്ച് കടക്കാരിയാവുക….
ആ ചിന്ത മനസ്സിലേക്ക് ഇരച്ചെത്തിയതും ബിനോയുടെ കണ്ണുകൾ നവാസിനെ തേടി…
തന്റെ അടിയേറ്റു തിണർത്ത വലം കവിളിൽ കൈ ചേർത്ത് ഭയന്നു തന്നെ നോക്കുന്നവനെ കണ്ടതും അവനരികിലേക്ക് ചുവടു വെച്ചു ബിനോയ്…
ഇനിയെന്നെ തല്ലല്ലേടാ ബിനൂ… അവിടെ കവലയിൽ വെച്ച് ബ്ലേഡ് ഗിരി അവന്റെ കൂട്ടാളികളോട് പറയുന്നത് ഞാൻ നേരിട്ട് കേട്ടതുകൊണ്ടാണ് നിന്നോടത് അങ്ങനെയേ വന്നു പറഞ്ഞത്… അല്ലാതെ നിന്റെ അമ്മയെ മോശക്കാരിയാക്കിയതോ അമ്മയെ പറ്റി അനാവശ്യം പറഞ്ഞതോ അല്ല ഞാൻ… എന്റെ ഉമ്മച്ചിയാണേ സത്യം….”
തന്നിലേക്ക് നടന്നടുക്കുന്ന ബിനോയെ ഭയത്തോടെ നോക്കി പിന്നിലേക്കടിവെച്ചു നീങ്ങി നവാസ് പറഞ്ഞതും കൈ നീട്ടി അവനെ പിടിച്ചു തനിയ്ക്കരികിലേക്ക് നിർത്തി ബിനോയ്….
കുഞ്ഞുനാൾ മുതൽ കൂടെയുണ്ടായിരുന്ന കൂട്ടുക്കാരൊക്കെ വഴി പിഴച്ചു ജീവിക്കുന്ന തന്നെ ഉപേക്ഷിച്ച് പല വഴി ചിതറി പോയപ്പോഴും കൂടെ നിന്നവനാണ്… തന്റെ ദേഷ്യവും ചീത്തയുമെല്ലാം ഏറ്റുവാങ്ങിയിട്ടും അകന്നുപോവാതെ അരികെ ചേർത്തു പിടിച്ചവനാണ്… ആ അവനെയാണ് കൈ നീട്ടി അടിച്ചത്….
കണ്ണു നിറഞ്ഞു ബിനോയിയുടെ….
എല്ലാവരെയും വേദനിപ്പിക്കാൻ വേണ്ടി മാത്രമുള്ളതാണ് തന്റെ ജീവിതമെന്ന് തോന്നിയവന്…
അറിയാതൊരു തേങ്ങൽ ചീളവന്റെ ഉള്ളിൽ നിന്ന് പുറത്തേക്ക് തെറിച്ചതും തന്റെ വലം കൈ അവന്റെ ചുമലോരം ഇടവനെ തന്നിലേക്ക് ചേർത്തു പിടിച്ചു നവാസ്
“ബിനൂ… നീ നിന്റെ വീട്ടിലേക്ക് മടങ്ങി ചെല്ലെടാ… നമ്മളറിയാത്ത എന്തൊക്കയോ ഉണ്ടവിടെ… വർഷം മൂന്നാലായില്ലേ നീ വീടുപേക്ഷിച്ച് ഇറങ്ങി പോന്നിട്ട്…. അതുമൊരു നന്ദിയില്ലാത്തവൾക്കു വേണ്ടി… ”
തന്റെ വാക്കുകൾ ബിനോയ് കേൾക്കുമെന്ന് തോന്നിയതും ശബ്ദം താഴ്ത്തിയവനെ ഉപദേശിച്ചു നവാസ്
നന്ദിയില്ലാത്തൊരുവൾക്കു വേണ്ടി….
ബിനോയുടെ കാതിൽ വീണ്ടും വീണ്ടും മുഴങ്ങി നവാസിന്റെയാ വാക്കുകൾ…
നവാസിനെ എതിർക്കാനോ തല്ലിയകറ്റാനോ കഴിയാതെ നിശ്ചലമിരുന്നു പോയവൻ
അവൻ പറഞ്ഞത് നൂറു ശതമാനം സത്യമാണ്… കഷ്ടപ്പെട്ട് വളർത്തിയ അമ്മയേയും കൗമാരം പിന്നിട്ട അനിയത്തിയേയും വീട്ടിലുപേക്ഷിച്ച് താനിറങ്ങി വന്നത് പ്രണയത്തിന്റെ മേലാവരണം ചാർത്തി തന്നെ മയക്കിയ ഒരുവൾക്കു വേണ്ടിയാണ്…
ലിന്റയ്ക്കു വേണ്ടി…
അവൾക്കൊപ്പം ജീവിക്കാൻ അവളുടെ വീട്ടുക്കാർ തടസ്സമായപ്പോൾ വളരെ നിസ്സാരമായ് തന്റെ വീട്ടുക്കാരെ ഉപേക്ഷിച്ചിറങ്ങി വന്നു അവൾ തനിക്കരികിലേക്ക്… ദുഃഖത്തിലും സന്തോഷത്തിലും കൂടെയുണ്ടാവുമെന്ന് വാക്ക് തന്നവൾ തിരികെ ആവശ്യപ്പെട്ടത് ഒന്നു മാത്രമാണ്…
അവൾ അവളുടെ കുടുംബം ഉപേക്ഷിച്ചതു പോലെ താൻ തന്റെ കുടുംബത്തെയും ഉപേക്ഷിക്കണമെന്ന്…
ആദ്യമൊന്ന് ഞെട്ടിയെങ്കിലും എത്ര പെട്ടന്നാണ് താനവൾക്ക് വേണ്ടി തന്റെ അമ്മയേയും അനിയത്തിയേയും മറന്നത്… പാതി വഴി ഉപേക്ഷിച്ചിറങ്ങി വന്നത്….
എന്നിട്ടിന്നാ ലിന്റ എവിടേ….?
വെറും ആറു മാസത്തെ ജീവിതത്തിനൊടുവിൽ തന്നെക്കാൾ നല്ലൊരുവനെന്നവൾക്കു തോന്നിയ ഒരുത്തനൊപ്പം വളരെ നിസ്സാരമായ് തന്നെ ഉപേക്ഷിച്ച് പോയവൾ
ഇന്നലെ വരെ വളർത്തി വലുതാക്കിയ മാതാപിതാക്കളെ ഇന്നു കണ്ട തനിയ്ക്ക് വേണ്ടി ഉപേക്ഷിച്ചവൾ നാളെ തന്നെക്കാൾ നല്ലൊരുവനെ കണ്ടാൽ തന്നെ ഉപേക്ഷിയ്ക്കുമെന്നത് താനറിയാൻ വൈകി പോയിരുന്നു….
എല്ലാവർക്കു മുന്നിലുമൊരു കോമാളിയായ് പരിഹാസപാത്രമായ് താൻ തീർന്നുവെന്ന തോന്നലിൽ കൂടെ കൂട്ടിയ മദ്യമാണ് പിന്നെ തന്നെയിതു വരെ നിയന്ത്രിച്ചിരുന്നത്… തന്റെ ചുറ്റും നടക്കുന്നതൊന്നും താനറിഞ്ഞിരുന്നില്ല. അറിയാൻ ശ്രമിച്ചതുമില്ല…’
തന്നെ തിരികെ വിളിക്കാൻ, കൂടെ കൊണ്ടുപോവാൻ വന്ന അമ്മയെ കഠിനമായ വാക്കുകളാൽ വേദനിപ്പിച്ച് ഇറക്കിവിട്ടു താനെന്നതു പോലും നവാസ് പറഞ്ഞറിഞ്ഞ അറിവേ തനിക്കുള്ളു…. അത്രയ്ക്കും ബോധം നശിച്ച ദിനങ്ങളായിരുന്നു തന്റെ ഇന്നലെകൾ….
നാളുകൾകഴിഞ്ഞൊരു ദിവസം രൂപത്തിലും സ്വഭാവത്തിലും അമ്മയുടെ മകനായ് ആ മുന്നിൽ ചെന്നു നിന്നു ബിനോയ്…
മുഖത്തു നോക്കാതെ തലയും താഴ്ത്തി മുന്നിൽ വന്നു നിൽക്കുന്ന ബിനോയിയെ കണ്ണെടുക്കാതെ നിറമിഴികളോടെ നോക്കി നിന്നു വസുധ….
രണ്ടു വർഷം മുമ്പ് അമ്മയേം പെങ്ങളേം ഉപേക്ഷിച്ച് സ്നേഹിക്കുന്ന പെണ്ണിനൊപ്പം പോയവനാണ്…
തനിച്ചു താമസിക്കണ്ട അവളേം കൂട്ടി ഇ വീട്ടിൽ ഒരുമിച്ചു താമസിക്കാം എന്നു പറഞ്ഞിട്ടു പോലും തിരിഞ്ഞു നോക്കാതെ പടിയിറങ്ങി പോയവൻ…
ഭർത്താവു മരിച്ചതിനു ശേഷമുള്ള തന്റെ ജീവിതമാണ് വസുധയുടെ മുന്നിലന്നേരം തെളിഞ്ഞു വന്നത്
അന്തി ചോപ്പ് ആകാശത്ത് മായം മുമ്പേ ആണൊരുത്തൻ അന്തിക്കൂട്ടിനില്ലാത്ത പെണ്ണുങ്ങളുടെ അരവണ്ണമളക്കാൻ മുഖം മറച്ച് പടി താണ്ടിയെത്തുന്ന പകൽ മാന്യന്മാരുടെ കൈക്കരുത്തിനെ ചെറുത്ത് തോല്പിച്ചിരുന്നത് ശരീരത്തിന്റെ ബലം കൊണ്ടായിരുന്നില്ല.. മനസ്സിന്റെ ബലമൊന്നു കൊണ്ടു മാത്രമാണ്….
നാളുകൾ കഴിയുമ്പോൾ തനിയ്ക്ക് കരുത്തായ് തന്റെ മകനുണ്ടാവുമെന്ന വിശ്വാസത്തിന്റെ മനോമ്പലം… അതു തകർത്തെറിഞ്ഞവൻ പടിയിറങ്ങിയപ്പോൾ അത്ര നാൾ പൊരുതിനിന്ന മനോബലവും തകർന്നു പോയിരുന്നു….
“ചെയ്ത തെറ്റിനൊന്നും ക്ഷമ ചോദിക്കുന്നില്ലമ്മേ… ക്ഷമിക്കാൻ കഴിയുന്നതല്ല ഞാൻ ചെയ്തു വെച്ചതെന്നറിയാം… ഒരവസരം കൂടി തരണം അമ്മയുടെ മകനായ് ജീവിക്കാൻ…. ”
ഒഴുകിയിറങ്ങുന്ന കണ്ണുനീരോടെ വസുധയുടെ കാൽക്കലേക്ക് വീണ ബിനോയിയെ ചേർത്തു പിടിക്കാൻ മാത്രമുള്ള മനക്കരുത്തേ ആ അമ്മയിലപ്പോൾ അവശേഷിച്ചിരുന്നുള്ളു…
“നിങ്ങൾ നൽകുന്ന പണത്തിന് ഈടായ് സ്വന്തം ശരീരം തരുന്ന പെണ്ണുങ്ങളുടെ കൂട്ടത്തിൽ നിന്നെന്റെ അമ്മയുടെ പേര് വെട്ടിമാറ്റിയേക്ക് ഗിരിയേട്ടാ… എന്റെ അമ്മ വാങ്ങിയ പണമെത്രയായാലും നിങ്ങൾ പറയുന്ന പലിശ തന്നത് വീട്ടിക്കോളാം ഞാൻ… എനിയ്ക്കിത്തിരി സാവകാശം തന്നാൽ മാത്രം മതി….
പലിശ പിരിവിനിറങ്ങിയ ബ്ലേഡ് ഗിരിയുടെ മുന്നിൽ ചെന്ന് ബിനോയ് പറയുമ്പോൾ അവനൊപ്പമിരുന്ന നവാസിന്റെ ദേഹം ഭയത്താൽ കിടുകിടുത്തിരുന്നു…
നീ പറഞ്ഞതെനിയ്ക്ക് മനസ്സിലായില്ല ബിനോയ്… ഞാൻ പലിശയ്ക്ക് പണം കൊടുക്കുന്നവൻ തന്നെയാണ്… അതിന് ഈടായ് പലരിൽ നിന്നും പലതും വാങ്ങിയിട്ടും ഉണ്ട്…. സ്വന്തം ശരീരം കൊണ്ട് മുതലും പലിശയും തന്നുവീട്ടിയവരുണ്ട് കൂട്ടത്തിൽ…
“അങ്ങനെ ശരീരംതന്നവരെല്ലാം സ്വമനസാലെ
തന്നവരാണ്… ബലമായിട്ടൊന്നും പിടിച്ചു വാങ്ങിയിട്ടില്ല ഇതുവരെ ഞാൻ ആരിൽ നിന്നും…
” നിന്റെ അമ്മ നിന്റെ അനിയത്തിയുടെ പഠനത്തിനാവശ്യമായ പണം ചോദിച്ചപ്പോൾ ഈട് ചോദിച്ചിട്ടില്ല ഞാൻ… ഈടായൊന്നും എനിയ്ക്ക് തന്നിട്ടുമില്ല വസുധ… എന്നിട്ടും ഞാനവർക്ക് പണം നൽകിയത് അവരോടുള്ള വിശ്വാസം കൊണ്ടും അവരെന്ന സ്ത്രീയോടുള്ള എന്റെ ബഹുമാനം കൊണ്ടുമാണ്…
ഇതിലെവിടെയാണ് ബിനോയ് ഞാൻ തെറ്റു ചെയ്തത്…?
നിന്നെയാരോ തെറ്റിദ്ധരിപ്പിച്ചതാണ് ബിനോയ്….
ശാന്തതയോടുള്ള ഗിരിയുടെ സംസാരത്തിൽ ബിനോയിയുടെ നോട്ടം നവാസിലെത്തിയതും കണ്ടു ഭയന്നു വിറച്ചുതന്നെ നോക്കുന്നവനെ
ഗിരിയോട് യാത്ര പറഞ്ഞ് അല്പം മുന്നോട്ടു നീങ്ങിയതും നവാസിന്റെ കഴുത്തിലമർന്നു ബിനോയിയുടെ കൈകൾ
“നിന്റെ നശിച്ച ജീവിതം മതിയാക്കി നിന്നെ തിരികെ നിന്റെ വീട്ടിലെത്തിക്കാൻ വേറൊരു വഴിയും ഞാൻ കണ്ടില്ല ബിനൂ…. അതോണ്ടു പറഞ്ഞൊരു കള്ളമാണത്…
ബിനോയുടെ കയ്യിൽ നിന്ന് ഒഴിഞ്ഞുമാറാൻ ശ്രമിച്ച് നവാസ് പറഞ്ഞതും അവനിലുള്ള പിടിമുറുക്കി ബിനോയ്
എന്റെ അമ്മയെ പറ്റി അനാവശ്യം പറഞ്ഞാണോടാ എന്നെ വീട്ടിലേക്ക് ഉണ്ടാക്കുന്നത്…?
മുരണ്ടു ബിനോയ്
“നിന്റെ അമ്മയോട് ഗിരി കാണിച്ച മര്യാദയൊന്നും ഈ നാട്ടുകാർ കാണില്ലെടാ…ഗിരിയിൽ നിന്ന് നിന്റമ്മ പണം വാങ്ങിയെന്നറിഞ്ഞപ്പോൾ മുതൽ ഈ നാട്ടുകാർ നിന്റെ അമ്മയെ കാണുന്നത് മോശം സ്ത്രീയായിട്ടാണ്… നീ തിരികെ നിന്റെ അമ്മയ്ക്ക് അടുത്തെത്തിയാൽ തീരുന്നതേയുള്ളു നാട്ടുകാരുടെ ധൈര്യമെന്നറിഞ്ഞോണ്ടു ഞാൻ പറഞ്ഞ നുണയാണത്….. ”
തന്റെ കയ്യിൽ കുതറി പിടഞ്ഞു പറയുന്നവനെ നിറയാനൊരുങ്ങുന്ന മിഴികളോടെ നോക്കിയൊരു നിമിഷം ബിനോയ്…
തന്റെ നെഞ്ചോടു ചേർത്തവനെ ആഞ്ഞു പുൽകുമ്പോൾ ഒരുപാടുസങ്കടങ്ങൾ തനിയ്ക്കായ് നൽകിയപ്പോഴും ഇവനെ പോലൊരുവനെ തന്റെ കൂട്ടുക്കാരനായ് തന്നതിന് അറിയാവുന്ന ദൈവങ്ങളോടെല്ലാം നന്ദി പറഞ്ഞു ബിനോയ്…
തകർന്നു തളർന്നു വീഴുമ്പോഴും, സമൂഹത്തിനു മുമ്പിൽ ഒന്നൂമല്ലാതായ് നമ്മൾ നാണം കെട്ടു നിൽക്കുമ്പോഴും ചേർത്തു നിർത്താൻ ഇതുപോലൊരു സൗഹൃദമുണ്ടെങ്കിൽ ഒറ്റപ്പെടില്ല ഒരിക്കലും എവിടെയും നമ്മളാരും…
തിരിച്ചറിഞ്ഞു ബിനോയിയും…..
RJ
