” നിന്നിൽ നിന്നും ഇത് ഞാൻ പ്രതീക്ഷിച്ചില്ല നീതു.. ”
പാർവതിയുടെ വാക്കുകളിൽ നീതു അതുവരെ പടുത്തുയർത്തിയ കള്ളങ്ങൾ ഓരോന്നായി വീണുടയുകയായിരുന്നു.
നീതുവും പാർവതിയും കോളേജ് മുതൽ നല്ല സുഹൃത്തുക്കൾ ആയിരുന്നു..
നീതു ഒരു സാധാരണ കുടുംബത്തിൽ ജനിച്ച പെൺകുട്ടി ആയിരുന്നു. എന്നാൽ അവൾ ജീവിക്കാൻ ആഗ്രഹിച്ചിരുന്നത് ഒരു ആർഭാട ജീവിതം ആയിരുന്നു.
പാർവതി അത്യാവശ്യം സാമ്പത്തിക ഭദ്രത ഉള്ള കുടുംബത്തിലെ കിട്ടുമായിരുന്നു എങ്കിലും അവൾക് ആർഭാട ജീവിതത്തോട് തീരെ താല്പര്യം ഇല്ലായിരുന്നു..
നീതു അവരുടെ കോളേജിൽ തന്നെയുള്ള രാകേഷും ആയി പ്രണയത്തിൽ ആയിരുന്നു.. രാകേഷ് ഒരു സമ്പന്ന കുടുംബത്തിലെ ചെക്കൻ ആയിരുന്നു. അവൻ നീതുവിന് വില കൂടിയ ഡ്രെസ്സും ഗിഫ്റ്റും ഒക്കെ കൊടുക്കുന്നത് പതിവായിരുന്നു.
എന്നാൽ നീതുവിന്റെ സംശയ രോഗം അവർക്കിടയിൽ നിരന്തരം പ്രശ്നങ്ങൾ ഉണ്ടാക്കാൻ തുടങ്ങി.. രാകേഷ് എല്ലാവരോടും വളരെ ഫ്രണ്ട്‌ലി ആയി പെരുമാറുന്ന ആളാണ് അതുകൊണ്ട് തന്നെ നീതു പലപ്പോഴും അവനെ സംശയത്തിന്റെ നിഴലിൽ നിർത്താറുണ്ട്..
അങ്ങനെയിരിക്കെ അവരുടെ കോളേജിലേക്ക് ഗോകുൽ പഠിക്കാൻ വരുന്നു. സാമ്പത്തികമായി രാകേഷിനെക്കാളും മുന്നിൽ ആയിരുന്നു ഗോകുൽ. എല്ലാവർക്കും പെട്ടെന്ന് ഇഷ്ടം തോന്നുന്ന സംസാര രീതിയും പെരുമാറ്റവും ആയിരുന്നു അവന്റേത്.
നീതുവിന്റെ കണ്ണ് മഞ്ഞളിച്ചു. ഗോകുലിന്റെ പണത്തോടും ആഡംബര ജീവിതത്തോടും അവൾക്ക് അടങ്ങാത്ത ആർത്തി തോന്നി. പക്ഷേ, മറ്റൊരു പ്രധാന സത്യം എന്തെന്നാൽ ഗോകുലിന്റെ ഉള്ളിൽ പാർവ്വതിയോട് ആത്മാർത്ഥമായ പ്രണയമുണ്ടായിരുന്നു.
പാർവ്വതിയുടെ ലാളിത്യവും ദയയുള്ള മനസ്സുമായിരുന്നു ഗോകുലിനെ ആകർഷിച്ചത്.
തന്റെ കൂടെയുള്ള പാർവ്വതിയോട് ഗോകുലിന് പ്രത്യേക താല്പര്യമുണ്ടെന്ന് നീതു തിരിച്ചറിഞ്ഞു. എങ്ങനെയും ഗോകുലിന്റെ മനസ്സിൽ നിന്നും പാർവതിയെ കളയണം എന്ന് അവൾ ഉറപ്പിച്ചു. അതിന് വേണ്ടി അവൾ ഓരോ തന്ത്രങ്ങൾ മെനയാൻ തുടങ്ങി..
രാകേഷും പാർവ്വതിയും തമ്മിൽ രഹസ്യമായി പ്രണയത്തിലാണെന്നും, അവർ തന്നെ ചതിക്കുകയാണെന്നും നീതു പ്രചരിപ്പിച്ചു. അതിനായി ചില വ്യാജ ചാറ്റുകളും അവൾ നിർമ്മിച്ചു.
ഒരു ദിവസം കരഞ്ഞുകൊണ്ട് ഗോകുലിന്റെ മുന്നിലെത്തിയ നീതു, ഈ ചാറ്റുകൾ ഓരോന്നായി അവനെ കാണിച്ചു.
“ഗോകുൽ… ഞാൻ ജീവന് തുല്യം സ്നേഹിച്ച രാകേഷും എന്റെ അടുത്ത കൂട്ടുകാരി പാർവ്വതിയും എന്നെ ചതിക്കുകയായിരുന്നു. ഇതാ അവരുടെ രഹസ്യബന്ധത്തിന്റെ തെളിവുകൾ!” നീതു വിതുമ്പിക്കൊണ്ട് പറഞ്ഞു.
എന്നാൽ ഗോകുൽ നീതു വിചാരിച്ചത് പോലൊരു വിഡ്ഢിയായിരുന്നില്ല.
പാർവ്വതിയുടെ വ്യക്തിത്വവും പരിശുദ്ധിയും ഗോകുലിന് നന്നായി അറിയാമായിരുന്നു. രാകേഷുമായി പാർവ്വതിക്ക് അങ്ങനെയൊരു ബന്ധമുണ്ടാകില്ലെന്ന് അവന് 100% ഉറപ്പായിരുന്നു. പക്ഷേ, പാർവ്വതി അത്യാവശ്യം നിഷ്കളങ്കയായതുകൊണ്ട്, കൂടെയുള്ള നീതു എന്ന വിഷപ്പാമ്പിന്റെ യഥാർത്ഥ സ്വഭാവം അവൾ തിരിച്ചറിഞ്ഞിട്ടില്ലെന്നും ഗോകുലിന് മനസ്സിലായി.
സത്യം പുറത്തുകൊണ്ടുവരാനും നീതുവിന്റെ മുഖംമൂടി അഴിച്ചുവെക്കാനും ഗോകുൽ ഒരു തന്ത്രം പ്രയോഗിച്ചു.
“അയ്യോ നീതു… പാർവ്വതിയും രാകേഷും നിന്നോട് ഇങ്ങനെ ചെയ്തോ? നീ ആ ചാറ്റുകൾ മുഴുവൻ എന്നെ ഏൽപ്പിക്ക്, ഞാൻ അവർക്കുള്ള പണി കൊടുത്തോളം ,” എന്ന് ഗോകുൽ നീതുവിനോട് പറഞ്ഞു.
ഗോകുൽ തന്റെ വലയിൽ വീണു എന്ന് തെറ്റിദ്ധരിച്ച നീതു, പാർവ്വതിക്കും രാകേഷിനുമെതിരെ താൻ ഉണ്ടാക്കിയ വ്യാജ ചാറ്റുകൾ മുഴുവൻ ഗോകുലിന് കൈമാറി.
ആ തെളിവുകളുമായി ഗോകുൽ നേരെ പാർവ്വതിയുടെ അടുത്തെത്തി.
“പാർവ്വതീ… നീ ആത്മാർത്ഥ സുഹൃത്തായി കൊണ്ടുനടക്കുന്ന നീതു നിനക്കെതിരെ നെയ്യുന്ന ചതിയാണിത്. നിന്നെ എന്റെ കണ്ണിൽ മോശക്കാരി ആക്കാനും , രാകേഷിന്റെ ജീവിതം തകർക്കാനും അവൾ ഉണ്ടാക്കിയ തെളിവുകളാണിത്,” ഗോകുൽ ആ ചാറ്റുകൾ പാർവ്വതിക്ക് കാണിച്ചു കൊടുത്തു.
തന്റെ മുന്നിൽ ചിരിച്ചു നിന്നിട്ട് പുറകിൽ വെച്ച് നീതു ചെയ്ത ക്രൂരതകൾ കണ്ട പാർവ്വതി ആകെ തകർന്നുപോയി. തന്റെ സൗഹൃദത്തെയാണ് നീതു പണത്തിനും സ്വാർത്ഥതയ്ക്കും വേണ്ടി ചവിട്ടിമെതിച്ചത്!
പാർവ്വതി നീതുവിനെ ഓഡിറ്റോറിയത്തിന് പിന്നിലേക്ക് വിളിച്ചുവരുത്തി.
“നിന്നിൽ നിന്നും ഇത് ഞാൻ പ്രതീക്ഷിച്ചില്ല നീതു…” പാർവ്വതിയുടെ വാക്കുകളിൽ നീതു അതുവരെ പടുത്തുയർത്തിയ കള്ളങ്ങൾ ഓരോന്നായി വീണുടയുകയായിരുന്നു.
“പാർവ്വതീ… അത്… അത് പിന്നെ…” നീതു എങ്ങനെയൊക്കെയോ കള്ളം പറയാൻ ശ്രമിച്ചു.
അപ്പോഴാണ് പിന്നിൽ നിന്ന് ഗോകുലും രാകേഷും മുന്നിലേക്ക് വന്നത്!
നീതു തരിച്ചുനിന്നുപോയി.
രാകേഷ് നീതുവിന്റെ അടുത്തേക്ക് വന്നു. അവന്റെ കണ്ണുകളിൽ അമർഷവും കടുത്ത അറപ്പുമായിരുന്നു.
“രാകേഷ്… ഞാൻ പറയുന്നത് ഒന്ന് കേൾക്കൂ…” നീതു കരഞ്ഞു.
“ഒന്നും പറയേണ്ട നീതു!” രാകേഷ് തടഞ്ഞു. “ചെറിയ സംശയരോഗം മാത്രം നിനക്കുണ്ട് എന്നാണ് ഞാൻ ഇതുവരെ കരുതിയത്. പക്ഷേ പണത്തിനും ആർഭാടത്തിനും വേണ്ടി സ്വന്തം കൂട്ടുകാരിയെപ്പോലും ചതിക്കുന്ന ഒരു തരംതാണ പെണ്ണാണ് നീയെന്ന് ഞാൻ അറിഞ്ഞില്ല. ഇനി നീയുമായി എനിക്കൊരു ബന്ധവുമില്ല!”
രാകേഷ് അവിടെവച്ച് നീതുവുമായുള്ള ബന്ധം എന്നെന്നേക്കുമായി ഉപേക്ഷിച്ചു
പാർവ്വതി നീതുവിന്റെ മുഖത്തേക്ക് നോക്കി ശാന്തമായി പറഞ്ഞു
“പാവപ്പെട്ട കുടുംബത്തിൽ നിന്ന് വന്നതുകൊണ്ട് നിനക്ക് ആഡംബരങ്ങളോട് കൊതിയുണ്ടായത് എനിക്ക് മനസ്സിലാക്കാൻ കഴിയും നീതു. പക്ഷേ, ഗോകുലിന്റെ പണം കണ്ട് കണ്ണുമഞ്ഞളിച്ച്, എന്നെയും രാകേഷിനെയും ഒരേപോലെ വലിച്ചെറിയാൻ നീ നോക്കുമെന്ന് ഞാൻ കരുതിയില്ല… ഈ നിമിഷം നിന്നുമായിട്ടുള്ള എന്റെ സൗഹൃദം ഞാൻ അവസാനിപ്പിക്കുകയാണ്. ഇനി എന്റെ ജീവിതത്തിലേക്ക് നീ വന്നേക്കരുത്!”
പാർവ്വതി തിരിഞ്ഞുനടന്നു.
ഗോകുൽ നീതുവിനെ വെറുപ്പോടെ ഒന്നു നോക്കുക മാത്രം ചെയ്തു. “പാർവ്വതിയെ നിനക്ക് മനസ്സിലായിട്ടില്ല നീതു… അവൾക്ക് പണത്തേക്കാൾ വലുതാണ് സൗഹൃദവും ആത്മാർത്ഥതയും. നിന്റെ ഈ വൃത്തികെട്ട മനസ്സുകൊണ്ട് എന്നെ നേടാൻ നിനക്ക് കഴിയില്ല.”
എല്ലാവരും അവിടെനിന്ന് ഇറങ്ങിപ്പോയി.
താൻ നെയ്ത ചതിയുടെ വലയിൽ നീതു തന്നെ വീണു. രാകേഷിന്റെ ആത്മാർത്ഥ പ്രണയവും നഷ്ടപ്പെട്ടു, പാർവ്വതിയുടെ വിശ്വസ്തമായ സൗഹൃദവും ഇല്ലാതായി, ഗോകുലിന്റെ മുന്നിൽ തന്റെ സ്വഭാവം വെളിപ്പെടുകയും ചെയ്തു..
✍️ആമി
