സന്തോഷേട്ടാ… ദയവുചെയ്ത്… എനിക്കിത് പറ്റുന്നില്ല. എനിക്ക് വേദനിക്കുന്നു,” അവൾ കൈകൾ കൂപ്പി യാചിച്ചു. “വേദനിക്കാൻ ഇതിലന്താ ഉള്ളത്….

“നീയെന്താ ഇവിടെ ഒരു കല്ല്‌ പോലെ കിടക്കുന്നത്? എനിക്കൊരു ശവത്തെയല്ല, എന്റെ ഭാര്യയെയാണ് ആവശ്യം!”

അർദ്ധരാത്രിയുടെ നിശ്ശബ്ദതയെ കീറിമുറിച്ചുകൊണ്ട് സന്തോഷിന്റെ ശബ്ദം ആ ബെഡ്റൂമിൽ മുഴങ്ങി. കട്ടിലിന്റെ ഒരു കോണിലേക്ക് ഒതുങ്ങിക്കൂടി, നെഞ്ചോട് പുതപ്പ് ചേർത്തുപിടിച്ച് വിറയ്ക്കുകയായിരുന്നു കാവ്യ. അവളുടെ കണ്ണുകളിൽ നിന്ന് ഒലിച്ചിറങ്ങിയ കണ്ണീർ തലയണയെ നനച്ചിരുന്നു. സന്തോഷിന്റെ മുഖത്ത് ദേഷ്യവും നിരാശയുമായിരുന്നു. മൊബൈൽ ഫോണിന്റെ നീലവെളിച്ചം അവന്റെ മുഖത്ത് വീണപ്പോൾ അവനിലെ ക്രൂരതയ്ക്ക് ആക്കം കൂടിയതുപോലെ തോന്നി.

“സന്തോഷേട്ടാ… ദയവുചെയ്ത്… എനിക്കിത് പറ്റുന്നില്ല. എനിക്ക് വേദനിക്കുന്നു,” അവൾ കൈകൾ കൂപ്പി യാചിച്ചു.

“വേദനിക്കാൻ ഇതിലന്താ ഉള്ളത്? ലോകത്തുള്ള സകല പെണ്ണുങ്ങളും ചെയ്യുന്ന കാര്യമാ ഇത്. നീ മാത്രം ഏതോ വലിയ  സാവിത്രി ചമയുകയാണോ? ഞാൻ നിനക്ക് കാണിച്ചുതന്ന ആ വീഡിയോയിൽ അവർ എത്ര സന്തോഷത്തോടെയാ അത് ചെയ്യുന്നത്? നിനക്ക് മാത്രം എന്താ ഇത്ര ജാഡ?” സന്തോഷ് ഫോൺ അവളുടെ മുഖത്തിന് നേരെ നീട്ടിക്കൊണ്ട് ആക്രോശിച്ചു. ആ സ്ക്രീനിൽ തെളിഞ്ഞ അശ്ലീല ദൃശ്യങ്ങൾ കണ്ട് കാവ്യ അറപ്പോടെയും ഭയത്തോടെയും മുഖം തിരിച്ചു.

വിവാഹം കഴിഞ്ഞ് കൃത്യം ഒരു വർഷം തികയുന്ന ആ രാത്രിയിലും കാവ്യയുടെ ജീവിതം ഒരു നരകതുല്യമായ യാഥാർത്ഥ്യത്തിലായിരുന്നു. സ്നേഹവും പരസ്പരബഹുമാനവുമുള്ള ഒരു ദാമ്പത്യം സ്വപ്നം കണ്ട അവൾക്ക് ലഭിച്ചത്, ഇന്റർനെറ്റിലെ വികൃതമായ ലൈംഗിക വൈകൃതങ്ങൾ സ്വന്തം ഭാര്യയിൽ പരീക്ഷിച്ച് ആനന്ദം കണ്ടെത്തുന്ന ഒരു ഭർത്താവിനെയായിരുന്നു.

ഒരു വർഷം മുൻപായിരുന്നു അവരുടെ വിവാഹം. കാവ്യ ഒരു പ്രൈവറ്റ് ബാങ്കിൽ ഉദ്യോഗസ്ഥയായിരുന്നു, സന്തോഷ് ഒരു മൾട്ടിനാഷണൽ കമ്പനിയിൽ ഐ.ടി എഞ്ചിനീയറും. സാമ്പത്തികമായും സാമൂഹികമായും ഒത്തുപോകുന്ന നല്ലൊരു ആലോചന. കാണാൻ സുന്ദരൻ, മാന്യമായി സംസാരിക്കുന്ന സ്വഭാവം. ആദ്യത്തെ കുറച്ചുദിവസങ്ങൾ വലിയ കുഴപ്പമില്ലാതെ കടന്നുപോയി. എന്നാൽ, മധുവിധു നാളുകളിൽ തന്നെ സന്തോഷിന്റെ യഥാർത്ഥ സ്വഭാവം പുറത്തുവരാൻ തുടങ്ങി.

അവരുടെ ആദ്യരാത്രികളിൽ സന്തോഷിന്റെ പെരുമാറ്റം ഒരു സാധാരണ ഭർത്താവിന്റേത് പോലെയല്ലെന്ന് കാവ്യയ്ക്ക് തോന്നിയിരുന്നു. അവൻ അവളെ ഒരു പങ്കാളിയായല്ല, മറിച്ച് തന്റെ കാമനകൾ തീർക്കാനുള്ള ഒരു ഉപകരണം മാത്രമായാണ് കണ്ടത്.

വിവാഹം കഴിഞ്ഞ് രണ്ടാമത്തെ ആഴ്ചയിലായിരുന്നു ആദ്യത്തെ വലിയ ആഘാതം. രാത്രി മുറിയിലേക്ക് വന്ന സന്തോഷ് ലാപ്ടോപ്പിൽ ഒരു അശ്ലീല വീഡിയോ ഓൺ ചെയ്ത് കാവ്യയുടെ മുന്നിലേക്ക് വെച്ചു.

“കാവ്യാ, ദാ ഇത് നോക്ക്. ഇതിൽ ഈ പെൺകുട്ടി ചെയ്യുന്നത് കണ്ടോ? എനിക്ക് നിന്നെ ഇതുപോലെ വേണം,” വളരെ സാധാരണ മട്ടിൽ സന്തോഷ് പറഞ്ഞു.

കാവ്യ ഞെട്ടിപ്പോയി. അത് കേവലം ഒരു ലൈംഗിക ദൃശ്യമായിരുന്നില്ല, മറിച്ച് അങ്ങേയറ്റം അക്രമാസക്തവും സ്ത്രീയെ അപമാനിക്കുന്നതുമായ വികൃത ദൃശ്യങ്ങളായിരുന്നു. “സന്തോഷേട്ടാ… എനിക്കിത് കാണാൻ പോലും അറപ്പ് തോന്നുന്നു. ദയവുചെയ്ത് ഇത് മാറ്റൂ,” കാവ്യ അസ്വസ്ഥതയോടെ പറഞ്ഞു.

സന്തോഷിന്റെ മുഖം പെട്ടെന്ന് മാറി. അവൻ ലാപ്ടോപ്പ് വശത്തേക്ക് നീക്കിവെച്ച് അവളുടെ താടിക്ക് കുത്തിപ്പിടിച്ചു. “എന്താടി പറഞ്ഞത്? അറപ്പോ? നിന്റെ കെട്ടിയവനാടി പറയുന്നത്. കല്യാണം കഴിഞ്ഞാൽ ഭർത്താവിനെ തൃപ്തിപ്പെടുത്തുക എന്നതാണ് പെണ്ണിന്റെ കടമ. അതിന് ലജ്ജയും നാണവും നോക്കിയിരുന്നാൽ ശരിയാവില്ല. ഞാൻ പറയുന്നത് പോലെ നീ ചെയ്യണം.”

അന്ന് രാത്രി അവളുടെ സമ്മതമില്ലാതെ, അവളുടെ കരച്ചിലിനെ അവഗണിച്ചുകൊണ്ട് സന്തോഷ് തന്റെ വൈകൃതങ്ങൾ അവളിൽ അടിച്ചേൽപ്പിച്ചു. കാവ്യയുടെ ശരീരവും മനസ്സും ഒരുപോലെ തകർന്നുപോയ രാത്രിയായിരുന്നു അത്.

ദിവസങ്ങൾ ആഴ്ചകൾക്കും മാസങ്ങൾക്കും വഴിമാറി. സന്തോഷിന്റെ ഈ സ്വഭാവത്തിന് യാതൊരു മാറ്റവുമുണ്ടായില്ല. പകരം, അത് കൂടിവരികയേ ഉള്ളൂ എന്ന് കാവ്യയ്ക്ക് മനസ്സിലായി. ഓഫീസ് കഴിഞ്ഞുവരുന്ന സന്തോഷിന്റെ കയ്യിൽ മിക്കപ്പോഴും പലതരം അസ്വാഭാവികമായ വസ്തുക്കളോ വസ്ത്രങ്ങളോ ഉണ്ടാകും. അശ്ലീല സിനിമകളിൽ കാണുന്നതുപോലെ വസ്ത്രം ധരിക്കാനും പെരുമാറാനും അവൻ അവളെ നിർബന്ധിച്ചു.

ഒരു ശനിയാഴ്ച രാത്രി സന്തോഷ് മദ്യപിച്ചാണ് വീട്ടിലെത്തിയത്. മുറിയിലേക്ക് വന്നയുടൻ അവൻ ഒരു കറുത്ത തുണി കാവ്യയുടെ നേർക്ക് എറിഞ്ഞു.

“ഇത് കെട്ടി നീ കട്ടിലിൽ കിടക്ക്. നിന്റെ കൈകൾ എനിക്ക് ജനൽ കമ്പിയിൽ കെട്ടിയിടണം,” സന്തോഷ് ആജ്ഞാപിച്ചു.

കാവ്യ ഭയന്നുവിറച്ചുപോയി. “സന്തോഷേട്ടാ… എനിക്ക് പേടിയാവുന്നു. എന്നെ ഇങ്ങനെ ഉപദ്രവിക്കരുത്. ഞാൻ നിങ്ങളുടെ ഭാര്യയല്ലേ? നമുക്ക് സാധാരണ പോലെ ജീവിച്ചുകൂടെ? എന്താണിതൊക്കെ?” അവൾ കരഞ്ഞുകൊണ്ട് ചോദിച്ചു.

സന്തോഷ് അവളുടെ കവിളിൽ ആഞ്ഞടിച്ചു. “നിന്റെ ഈ പ്രസംഗം കേൾക്കാൻ എനിക്ക് സമയമില്ല. നീ ഏത് നൂറ്റാണ്ടിലാണ് ജീവിക്കുന്നത്? ഇതൊക്കെ ഇന്നത്തെ കാലത്ത് എല്ലാവരും ചെയ്യുന്നതാ. നിനക്ക് എന്തോ അസുഖമുണ്ട്. അതാ നീ ഇങ്ങനെ വിറയ്ക്കുന്നത്. ഒരു ഭാര്യയെന്ന നിലയിൽ എന്നെ സുഖിപ്പിക്കാൻ നിനക്ക് ബാധ്യതയുണ്ട്.”

“ഇത് സുഖിപ്പിക്കലല്ല സന്തോഷേട്ടാ, ഇത് മൃഗീതയമാണ്. എന്നെ സ്നേഹത്തോടെ ഒന്ന് തൊടാൻ പോലും നിങ്ങൾക്ക് അറിയില്ലേ?” കാവ്യ ഉറക്കെ നിലവിളിച്ചു.

“മിണ്ടരുത്!” സന്തോഷ് അവളുടെ മുടിയിൽ കുത്തിപ്പിടിച്ചു. “സ്നേഹിക്കാൻ എനിക്ക് വേറെ ആളെ അറിയാം. നീയൊരു ഭാര്യയാണ്. ഞാൻ ആവശ്യപ്പെടുമ്പോൾ കിടന്നുതരിക, ഞാൻ പറയുന്നത് ചെയ്യുക. അത് മാത്രമാണ് നിന്റെ ജോലി.”

അന്ന് രാത്രി സന്തോഷ് അവളെ ക്രൂരമായി ഉപദ്രവിച്ചു. വേദന സഹിക്കാൻ വയ്യാതെ അവൾ ബോധരഹിതയായിപ്പോയി. പിറ്റേന്ന് രാവിലെ ഉണരുമ്പോൾ ശരീരമാകെ നീലിച്ച പാടുകളുമായി അവൾ കിടക്കയിൽ കിടക്കുകയായിരുന്നു. സന്തോഷ് യാതൊരു ഭാവവ്യത്യാസവുമില്ലാതെ ചായ കുടിച്ചുകൊണ്ട് ലിവിങ് റൂമിൽ ഇരിക്കുന്നുണ്ടായിരുന്നു.

ഈ ക്രൂരതകൾ ആരോടെങ്കിലും പറയണം എന്ന് കാവ്യ ആഗ്രഹിച്ചു. ഒരു ദിവസം അവൾ സ്വന്തം അമ്മയെ ഫോണിൽ വിളിച്ചു.

“അമ്മേ… എനിക്ക് ഇവിടെ ജീവിക്കാൻ പറ്റുന്നില്ല. സന്തോഷേട്ടൻ… സന്തോഷേട്ടൻ ഒരു നല്ല മനുഷ്യനല്ല,” അവൾ വിതുമ്പിക്കൊണ്ട് പറഞ്ഞു.

“എന്താ മോളേ? സന്തോഷ് നിന്നെ അടിക്കുകയോ മറ്റോ ചെയ്യാറുണ്ടോ? കുടിയുണ്ടോ?” അമ്മ ആശങ്കയോടെ ചോദിച്ചു.

“അതല്ല അമ്മേ… രാത്രികളിൽ… പുള്ളിയുടെ പെരുമാറ്റം… എനിക്ക് സഹിക്കാൻ പറ്റുന്നില്ല. വലിയ ഉപദ്രവമാണ്,” ബെഡ്റൂമിലെ രഹസ്യങ്ങൾ പൂർണ്ണമായി തുറന്നുപറയാൻ  ആ പെൺകുട്ടിക്ക് മടിയായിരുന്നു.

അമ്മ നെടുവീർപ്പിട്ടു. “മോളേ, പുരുഷന്മാർ ആകുമ്പോൾ ചില കാര്യങ്ങളിൽ അല്പം വാശിയൊക്കെ ഉണ്ടാകും. നീ അതൊക്കെ അനുസരിച്ച് പോകണം. കല്യാണം കഴിഞ്ഞാൽ ഭർത്താവാണ് എല്ലാം. കിടപ്പറയിലെ കാര്യങ്ങൾ പുറത്തുപറയുന്നത് കുടുംബത്തിന് നാണക്കേടാണ്. നീ കുറച്ചുകൂടി സഹിഷ്ണുത കാണിക്കണം. ഒരു കുഞ്ഞുണ്ടായാൽ ഒക്കെ മാറിക്കോളും.”

അമ്മയുടെ മറുപടി കാവ്യയെ കൂടുതൽ നിരാശയാക്കി. സ്വന്തം വീട്ടുകാർ പോലും തന്റെ വേദന മനസ്സിലാക്കില്ലെന്ന് അവൾക്ക് ബോധ്യമായി. സമൂഹത്തിൽ വലിയ മാന്യനായി നടക്കുന്ന സന്തോഷിനെക്കുറിച്ച് ആര് വിശ്വസിക്കും? പുറത്തുപോകുമ്പോൾ അവൻ കാവ്യയുടെ കൈ പിടിച്ച് നടക്കും, സ്നേഹമുള്ള ഭർത്താവായി അഭിനയിക്കും. എന്നാൽ ആ നാല് ചുവരുകൾക്കുള്ളിൽ അവൻ ഒരു മൃഗമായി മാറി.

ഒരു ദിവസം സന്തോഷിന്റെ ഫോണിലേക്ക് ഒരു മെസ്സേജ് വരുന്നത് കാവ്യ കണ്ടു. അവൻ ബാത്റൂമിൽ പോയ സമയത്തായിരുന്നു അത്. യാദൃശ്ചികമായി നോക്കിയ കാവ്യ ഞെട്ടിപ്പോയി. പല തരം പോൺ ഗ്രൂപ്പുകളിലും, വികൃതമായ ലൈംഗിക താല്പര്യങ്ങളുള്ള ആളുകളുടെ ചാറ്റുകളിലും സന്തോഷ് സജീവമായിരുന്നു. തങ്ങളുടെ കിടപ്പറയിലെ ചില രഹസ്യങ്ങൾ പോലും അവൻ സുഹൃത്തുക്കളുമായി പങ്കുവെച്ചിട്ടുണ്ടെന്ന് മനസ്സിലാക്കിയപ്പോൾ കാവ്യയ്ക്ക് ശർദ്ദിക്കാൻ വന്നു.

അവൾക്ക് അവനോടുള്ള ബഹുമാനം പൂർണ്ണമായും നഷ്ടപ്പെട്ടു. വെറുപ്പ് മാത്രമാണ് ആ മനസ്സിൽ അവശേഷിച്ചത്.

മാസങ്ങൾ കഴിഞ്ഞിട്ടും സന്തോഷിന്റെ പീഡനങ്ങൾ വർദ്ധിച്ചതേയുള്ളൂ. ഒരു ദിവസം ഓഫീസിൽ വെച്ച് കാവ്യ തലകറങ്ങി വീണു. സഹപ്രവർത്തകയായ അഞ്ജലി അവളെ അടുത്തുള്ള ഹോസ്പിറ്റലിൽ എത്തിച്ചു.

ഡോക്ടർ കാവ്യയെ പരിശോധിച്ചപ്പോൾ അവളുടെ ശരീരത്തിലെ പാടുകൾ കണ്ടു. ഡോക്ടർ അഞ്ജലിയോട് മാറിനിൽക്കാൻ ആവശ്യപ്പെട്ട് കാവ്യയോട് തനിയെ സംസാരിച്ചു.

“കാവ്യാ… ഈ പാടുകൾ എങ്ങനെ ഉണ്ടായതാണ്? ആരെങ്കിലും ഉപദ്രവിച്ചതാണോ?” ഡോക്ടർ സൗമ്യമായി ചോദിച്ചു.

കാവ്യയുടെ നിയന്ത്രണം നഷ്ടപ്പെട്ടു. അവൾ ഡോക്ടറുടെ മുന്നിൽ പൊട്ടിക്കരഞ്ഞു. കഴിഞ്ഞ ഒരു വർഷമായി താൻ അനുഭവിക്കുന്ന നരകയാതനകൾ അവൾ ഓരോന്നായി തുറന്നുപറഞ്ഞു. അശ്ലീല വീഡിയോകൾ കാണിച്ച് നിർബന്ധിക്കുന്നതും, വിസമ്മതിക്കുമ്പോൾ ക്രൂരമായി മർദ്ദിക്കുന്നതും, മാനസികമായി തകർക്കുന്നതും എല്ലാം അവൾ വിവരിച്ചു.

ഡോക്ടർ കാവ്യയുടെ കൈകൾ ചേർത്തുപിടിച്ചു. “കാവ്യാ, നീ അനുഭവിക്കുന്നത് കടുത്ത ഗാർഹിക പീഡനമാണ്. ഇത് ലൈംഗിക വൈകൃതമാണ്. ഇതിന് നീ കൂട്ടുനിൽക്കേണ്ടതില്ല. നിന്റെ സമ്മതമില്ലാതെ ഭർത്താവ് ചെയ്യുന്ന ഇത്തരം കാര്യങ്ങൾ ‘മാരിറ്റൽ റേപ്പ്’  ആണ്. നീ ഇതിനെതിരെ പ്രതികരിക്കണം. നിന്റെ ജീവനും മാനസികാരോഗ്യവുമാണ് പ്രധാനം.”

ഡോക്ടറുടെ വാക്കുകൾ കാവ്യയ്ക്ക് ഒരു പുതിയ വെളിച്ചം നൽകി. താൻ തെറ്റുകാരിയല്ലെന്നും, സന്തോഷിന്റെ മാനസികാവസ്ഥയാണ് തകരാറിലെന്നും അവൾക്ക് പൂർണ്ണമായി ബോധ്യമായി.

ഹോസ്പിറ്റലിൽ നിന്ന് ഇറങ്ങിയ ശേഷം അഞ്ജലി അവളോട് ചോദിച്ചു, “കാവ്യാ, എന്താണ് പ്രശ്നം? എന്നോട് പറ.”

കാവ്യ അഞ്ജലിയോട് എല്ലാം തുറന്നുപറഞ്ഞു. അഞ്ജലി കോപാകുലയായി. “കാവ്യാ, നീ ഇനിയും ആ നരകത്തിലേക്ക് തിരിച്ചുപോകരുത്. അവൻ ഒരു സൈക്കോയാണ്. നീ ഉടൻ തന്നെ ഇതിനൊരു പരിഹാരം കാണണം. നിയമപരമായി നീ മുന്നോട്ട് പോകണം.”

അന്ന് രാത്രി വീട്ടിലെത്തിയ കാവ്യയുടെ മനസ്സിൽ ഉറച്ച ഒരു തീരുമാനമുണ്ടായിരുന്നു. ഇനിയും തനിക്ക് ഈ ജീവിതം വേണ്ട. ഒരു വർഷം താൻ സഹിച്ചു, ഇനിയും സഹിച്ചാൽ തനിക്ക് ഭ്രാന്ത് പിടിക്കും അല്ലെങ്കിൽ താൻ ആത്മഹത്യ ചെയ്യേണ്ടി വരും.

രാത്രി പതിവുപോലെ സന്തോഷ് മുറിയിലേക്ക് വന്നു. അവന്റെ കയ്യിൽ അന്നും ഫോണുണ്ടായിരുന്നു.

“കാവ്യാ, ഇന്ന് ഒരു പുതിയ വീഡിയോ കണ്ടു. നമുക്ക് അത് ട്രൈ ചെയ്യാം,” സന്തോഷ് ചിരിച്ചുകൊണ്ട് പറഞ്ഞു.

കാവ്യ കട്ടിലിൽ നിന്ന് എഴുന്നേറ്റു നിന്നു. അവളുടെ മുഖത്ത് ഭയത്തിന് പകരം കടുത്ത ദൃഢതയായിരുന്നു.

“ഇല്ല സന്തോഷ്. ഇനി ഇല്ല. ഞാൻ ഒന്നും ചെയ്യില്ല,” അവൾ ശാന്തമായി എന്നാൽ ശക്തമായി പറഞ്ഞു.

സന്തോഷ് അത്ഭുതത്തോടെ അവളെ നോക്കി. “എന്താടി പറഞ്ഞത്? നിനക്ക് വീണ്ടും അടികൊള്ളണോ?” അവൻ അവളുടെ നേർക്ക് അടുത്തു.

“കൈയ്യേറ്റം ചെയ്യാൻ നോക്കണ്ട സന്തോഷ്!” കാവ്യ ഉറച്ച ശബ്ദത്തിൽ പറഞ്ഞു. “കഴിഞ്ഞ ഒരു വർഷമായി ഞാൻ നിന്റെ ഈ ഭ്രാന്തിന് ഇരയാവുകയായിരുന്നു. നീ കാണുന്ന ആ വികൃത വീഡിയോകളിലെ പെണ്ണല്ല ഞാൻ. ഞാൻ നിന്റെ ഭാര്യയാണ്, അല്ലാതെ നിന്റെ വൈകൃതങ്ങൾ തീർക്കാനുള്ള ഒരു കളിപ്പാവയല്ല.”

“നീ എന്നെ എതിർക്കാൻ വളർന്നോടി?” സന്തോഷ് അവളുടെ കൈക്ക് പിടിച്ചു തിരിച്ചു.

“ആ കൈ വിട് സന്തോഷ്!” കാവ്യ അവന്റെ കൈ തട്ടിമാറ്റി. “നിന്റെ ഈ രോഗത്തിന് ഞാൻ ഇനിയും കൂട്ടുനിൽക്കില്ല. ഞാൻ നാളെ ഈ വീട് വിട്ടു പോവുകയാണ്. എനിക്ക് നിന്നിൽ നിന്ന് വിവാഹമോചനം വേണം.”

‘വിവാഹമോചനം’ എന്ന വാക്ക് കേട്ടതും സന്തോഷ് ഒരു നിമിഷം ഞെട്ടി. പക്ഷെ പെട്ടെന്ന് അവൻ ഉറക്കെ ചിരിച്ചു. “ഡിവോഴ്സോ? നീയോ? നീ പോയി കേസ് കൊടുത്താൽ ആര് വിശ്വസിക്കും? കിടപ്പറയിലെ കാര്യങ്ങൾ കോടതിയിൽ പോയി വിളിച്ചുപറയാൻ നിനക്ക് നാണമില്ലേ? നാട്ടുക്കാർ എന്ത് പറയും?”

“നാട്ടുകാർ എന്ത് വേണമെങ്കിലും പറയട്ടെ സന്തോഷ്. എന്റെ ആത്മാഭിമാനവും ജീവനും എനിക്ക് വലുതാണ്. നീ വലിയ മാന്യനായി ജീവിച്ചോ, പക്ഷെ കോടതിയിൽ നിന്റെ ഈ തനിനിറം ഞാൻ പുറത്തുകൊണ്ടുവരും. നീ ഫോണിൽ ചാറ്റ് ചെയ്യുന്ന ഗ്രൂപ്പുകളുടെ സ്ക്രീൻഷോട്ടുകളും, നിന്റെ ഫോൺ റെക്കോർഡുകളും, എന്റെ ശരീരത്തിലെ ഈ പാടുകളുടെ മെഡിക്കൽ സർട്ടിഫിക്കറ്റും എന്റെ കയ്യിലുണ്ട്,” കാവ്യ വിരൽ ചൂണ്ടി പറഞ്ഞു.

അവളുടെ കയ്യിലെ തെളിവുകളെക്കുറിച്ച് കേട്ടപ്പോൾ സന്തോഷിന്റെ മുഖത്തെ ഭാവം മാറി. അവൻ ഭയപ്പെടാൻ തുടങ്ങി. അവന്റെ മാന്യൻ എന്ന മുഖമൂടി അഴിഞ്ഞുവീഴുമെന്ന് അവൻ ഉറപ്പിച്ചു.

“കാവ്യാ… നീ വെറുതെ പ്രശ്നം ഉണ്ടാക്കരുത്. നമുക്ക് സംസാരിച്ച് തീർക്കാം,” സന്തോഷിന്റെ ശബ്ദം താണു.

“സംസാരിക്കാൻ ഇനി ഒന്നുമില്ല സന്തോഷ്. കഴിഞ്ഞ ഒരു വർഷമായി ഞാൻ സംസാരിക്കാൻ ശ്രമിച്ചപ്പോഴൊക്കെ നീ എന്നെ തല്ലി ഒതുക്കുകയായിരുന്നു. ഇനി ഞാൻ സംസാരിക്കില്ല, എന്റെ വക്കീൽ സംസാരിച്ചോളും,” കാവ്യ തന്റെ ബാഗ് പാക്ക് ചെയ്യാൻ തുടങ്ങി.

പിറ്റേന്ന് രാവിലെ കാവ്യ ആ വീടിന്റെ പടികളിറങ്ങി. ഒരു വർഷത്തെ കറുത്ത ഓർമ്മകളെ ആ മുറിയിൽ ഉപേക്ഷിച്ചുകൊണ്ട് അവൾ പുറത്തേക്ക് നടന്നു. സൂര്യപ്രകാശത്തിന് അന്ന് വലിയൊരു തിളക്കമുള്ളതായി അവൾക്ക് തോന്നി.

അവൾ നേരെ സ്വന്തം വീട്ടിലേക്കാണ് പോയത്. മാതാപിതാക്കളുടെ മുന്നിൽ അവൾ കാര്യങ്ങൾ തുറന്നുപറഞ്ഞു. ആദ്യം അവർ വിഷമിച്ചെങ്കിലും, കാവ്യയുടെ ശരീരത്തിലെ പാടുകളും അവളുടെ ഉറച്ച തീരുമാനവും കണ്ടപ്പോൾ അവർ മകൾക്കൊപ്പം നിൽക്കാൻ തീരുമാനിച്ചു.

കാവ്യ സന്തോഷിനെതിരെ ഗാർഹിക പീഡനത്തിനും മാരിറ്റൽ റേപ്പിനും കേസ് ഫയൽ ചെയ്തു. ഡിവോഴ്സ് നോട്ടീസ് കിട്ടിയപ്പോൾ സന്തോഷ് കേസ് ഒത്തുതീർപ്പാക്കാൻ ഒരുപാട് ശ്രമിച്ചു. തന്റെ അന്തസ്സ് പോകുമെന്ന ഭയത്താൽ അവൻ കാവ്യയുടെ കാലുപിടിച്ച് മാപ്പ് അപേക്ഷിച്ചു. എന്നാൽ കാവ്യ തന്റെ തീരുമാനത്തിൽ നിന്ന് ഒരടി പോലും പിന്നോട്ട് പോയില്ല.

മാസങ്ങൾ നീണ്ട കോടതി നടപടികൾക്കൊടുവിൽ കാവ്യയ്ക്ക് സന്തോഷിൽ നിന്ന് നിയമപരമായ വിവാഹമോചനം ലഭിച്ചു.

കോടതി മുറിയിൽ നിന്ന് പുറത്തിറങ്ങിയ കാവ്യ ആശ്വാസത്തോടെ ഒരു ദീർഘശ്വാസം എടുത്തു. അവൾ അഞ്ജലിയെ നോക്കി പുഞ്ചിരിച്ചു.

ഒരു വർഷത്തെ നരകയാതനകൾ അവളെ തളർത്തിയിരുന്നില്ല, മറിച്ച് കൂടുതൽ ശക്തയാക്കുകയായിരുന്നു ചെയ്തത്. സ്വന്തം ശരീരത്തിന്മേലും മനസ്സിന്മേലുമുള്ള അധികാരം മറ്റാർക്കുമല്ല, തനിക്ക് മാത്രമാണെന്ന തിരിച്ചറിവോടെ കാവ്യ തന്റെ പുതിയ ജീവിതത്തിലേക്ക് ചുവടുവെച്ചു.

✍️ആമി