“ഞാൻ അരവിന്ദിന്റെ വൈഫ് ആണ്!!”
സുന്ദരിയായ ആ യുവതി പറഞ്ഞത് കേട്ട് താൻ അവിടെ തളർന്നു വീണുപോകുമോ എന്ന് ചിത്രയ്ക്ക് തോന്നി. താൻ അതിമനോഹരമായി കബളിപ്പിക്കപ്പെട്ടിരിക്കുന്നു എന്ന സത്യം ചുട്ടുപൊള്ളുന്ന വേദനയോടെ അവൾ തിരിച്ചറിഞ്ഞു. ആ ഓർമ്മ അവളെ വല്ലാതെ തളർത്തി. മരവിച്ച മനസ്സുമായി നിന്ന ചിത്രയോട് ആ യുവതി വീണ്ടും ചോദിച്ചു:
”ആരാ മനസ്സിലായില്ലല്ലോ? അരവിന്ദേട്ടന്റെ കൂടെ ബാങ്കിൽ ജോലി ചെയ്തിരുന്ന ആളാണോ? തിരുവനന്തപുരത്തുനിന്നാണ് എന്ന് പറഞ്ഞപ്പോൾ ചോദിച്ചതാണ്. അരവിന്ദേട്ടൻ മുൻപ് അവിടെയായിരുന്നു!”
ആ പെൺകുട്ടി നിഷ്കളങ്കമായ ചിരിയോടെയാണ് സംസാരിക്കുന്നത്. ആ ചിരി ചിത്രയുടെ ഉള്ളിൽ ആയിരം സൂചികൾ തറയ്ക്കുന്നത് പോലെ തോന്നിപ്പിച്ചു. തന്നെയും തന്റെ ജീവിതത്തെയും ഇത്രയും ക്രൂരമായി വഞ്ചിച്ച ഒരാൾ ഇവിടെ ഇങ്ങനെ സുരക്ഷിതമായി, സന്തോഷത്തോടെ കഴിയുന്നു എന്നറിയുന്നത് അസഹനീയമായിരുന്നു. തൊണ്ടയിൽ വല്ലാതെ എന്തോ കുരുങ്ങുന്നത് പോലെ തോന്നിയെങ്കിലും അവൾ ഒരുവിധം വാക്കുകൾ പുറത്തെടുത്തു.
”അതെ… ബാങ്കിൽ കൂടെയുണ്ടായിരുന്നതാണ്. ഞാൻ പിന്നെ വരാം…”
എങ്ങനെയൊക്കെയോ അത്രയും പറഞ്ഞു ഒപ്പിച്ച് അവിടെ നിന്ന് അവൾ തിരികെ നടന്നു. കാലുകൾക്ക് വല്ലാത്ത ഭാരം അനുഭവപ്പെട്ടു. കണ്ണുകൾ മങ്ങുന്നത് പോലെ. വഴിയരികിലെ ഒരു തണൽമരത്തിന് ചുവട്ടിലിരിക്കുമ്പോൾ പഴയ കാര്യങ്ങൾ ഓരോന്നായി അവളുടെ ഓർമ്മയിലേക്ക് ഇരച്ചുകയറി.
ഒരു വിധവയായിരുന്നു ചിത്ര. സന്തോഷം നിറഞ്ഞ ദാമ്പത്യജീവിതം ഇടയ്ക്കെപ്പോഴോ വില്ലനായി കടന്നുവന്ന ആ ആക്സിഡന്റ് അവളുടെ ലോകം തന്നെ മാറ്റിമറിച്ചു.
ചിത്രയെ ജീവനുതുല്യം സ്നേഹിച്ചിരുന്ന ഭർത്താവ് ആക്സിഡന്റിൽ അവളെ വിട്ടു പോയി പക്ഷേ, ഭർത്താവ് മരിച്ചെങ്കിലും അയാളുടെ അച്ഛനും അമ്മയും അവളെ കൈവിട്ടില്ല. സ്വന്തം മകളെപ്പോലെയാണ് അവർ ചിത്രയെ നോക്കിയത്. തങ്ങളുടെ ഏക മകൻ നഷ്ടപ്പെട്ട വേദനയിലും അവർ ചിത്രയ്ക്ക് തണലായി നിന്നു. അവരും ചിത്രയെ അവരുടെ മകന്റെ സ്ഥാനത്താണ് കണ്ടത്.
ചിത്രയ്ക്ക് തിരിച്ചും അവരോട് അതുപോലെതന്നെ സ്നേഹവും ബഹുമാനവുമായിരുന്നു. ടൗണിൽ അവർക്കൊരു സൂപ്പർമാർക്കറ്റ് ഉണ്ടായിരുന്നു. ഒഴിവ് സമയങ്ങളിൽ അവരെ സഹായിക്കാൻ ചിത്രയും അവിടെ പോകുമായിരുന്നു.
ഇതിനിടയിലാണ് ചിത്രയ്ക്ക് കടുത്ത ഒരു പനി പിടിച്ചത്. കുറച്ചുദിവസം അവൾക്ക് വീട്ടിൽ വിശ്രമിക്കേണ്ടി വന്നു.
ഈ സമയത്താണ് അവരുടെ വീടിന് അടുത്തുള്ള വീട്ടിൽ വാടകയ്ക്ക് താമസിക്കാൻ വന്ന അരവിന്ദനെ അവൾ പരിചയപ്പെടുന്നത്. ബാങ്ക് ഉദ്യോഗസ്ഥൻ ആണെന്നാണ് അയാൾ പറഞ്ഞിരുന്നത്. കാണാൻ നല്ല രൂപം, മാന്യമായ പെരുമാറ്റം. വൈകുന്നേരങ്ങളിൽ വീടിന് മുന്നിലെ ഗ്രൗണ്ടിൽ കുട്ടികളോടൊപ്പം കളിക്കാൻ അയാളും വരുമായിരുന്നു. അവിടെ വച്ച് കണ്ടുള്ള ആ ചെറിയ ചിരിയോടെയാണ് സൗഹൃദം തുടങ്ങിയത്.
ആദ്യമൊക്കെ വഴിയിൽ വച്ച് കാണുമ്പോഴുള്ള സുഖവിവരങ്ങൾ അന്വേഷിക്കലായിരുന്നു. പതുക്കെപ്പതുക്കെ അയാൾ ചിത്രയുടെ വീട്ടിലേക്ക് വരാൻ തുടങ്ങി. “വീട്ടിൽ ഒറ്റയ്ക്കിരിക്കുമ്പോൾ വല്ലാത്ത ബോറടി, ചിത്രയുടെ വീട്ടിലെ അച്ഛനോടും അമ്മയോടും സംസാരിക്കുമ്പോൾ വലിയൊരു ആശ്വാസമാണ്” എന്നൊക്കെയായിരുന്നു അയാൾ പറഞ്ഞിരുന്നത്. പാവം അച്ഛനും അമ്മയും അയാളെ വിശ്വസിച്ചു. മകൻ നഷ്ടപ്പെട്ട ആ വീട്ടിലേക്ക് ഒരാൾ വരുന്നത് അവർക്കും സന്തോഷമായിരുന്നു.
സൂപ്പർമാർക്കറ്റിലേക്ക് അച്ഛനും അമ്മയും പോയിക്കഴിഞ്ഞാൽ പിന്നെ ചിത്ര വീട്ടിൽ തനിയെയാണ്. ആ സമയങ്ങൾ നോക്കി അരവിന്ദ് സ്ഥിരം വരാൻ തുടങ്ങി. അയാളുടെ സംസാരത്തിൽ ചിത്ര വീണുപോയി. നഷ്ടപ്പെട്ട പ്രണയവും തണലും വീണ്ടും കിട്ടിയത് പോലെ അവൾക്ക് തോന്നി. ആ സൗഹൃദം വളരെ പെട്ടെന്ന് തന്നെ തീവ്രമായ പ്രണയത്തിലേക്കും പിന്നീട് അവൾ പോലും അറിയാതെ മറ്റു ശാരീരിക ബന്ധങ്ങളിലേക്കും നീങ്ങി.
തന്നെ വിവാഹം കഴിക്കുമെന്നും, ഇനി താനുണ്ടാകും കൂടെ എന്നുമുള്ള അയാളുടെ വാക്കുകൾ അവൾ പൂർണ്ണമായും വിശ്വസിച്ചു.
കാര്യങ്ങളെല്ലാം കഴിഞ്ഞു എന്ന് ബോധ്യപ്പെട്ടതോടെ അരവിന്ദിന്റെ സ്വഭാവം മാറിത്തുടങ്ങി. ഒരു ദിവസം പെട്ടെന്ന് അയാൾ താമസം ഒഴിഞ്ഞുപോയി. ഫോൺ വിളിച്ചാൽ കിട്ടാതായി.
ആ സമയത്താണ് ചിത്ര മറ്റൊരു ഞെട്ടിക്കുന്ന കാര്യം അറിയുന്നത്; താൻ ഗർഭിണിയാണ്. ആ സത്യം അവളുടെ ലോകം തകർത്തു. സ്വന്തം മകന്റെ ഭാര്യയെ വിശ്വസിച്ച് കൂടെ നിർത്തിയ ആാാ അച്ഛനും അമ്മയും തകർന്നുപോയി. തന്നെ സ്വന്തം മകളെപ്പോലെ നോക്കിയ ആ മാതാപിതാക്കളുടെ ദേഷ്യം അവൾക്ക് താങ്ങാൻ കഴിഞ്ഞില്ല.
ഒടുവിൽ നാട്ടുകാരുടെ സമ്മർദത്തിന് വഴങ്ങി അവർ അവളെ ആ വീട്ടിൽ നിന്നും പുറത്താക്കി. സ്വന്തം വീട്ടിൽ ചെന്നെങ്കിലും അവർക്കും അവളെ സ്വീകരിക്കാൻ മനസ്സ് വന്നില്ല.
ഒരു പെൺകുട്ടി എന്ന നിലയിൽ താൻ എവിടെപ്പോകും എന്നറിയാതെ അവൾ തകർന്നു.
പക്ഷേ, തന്നെ ഈ അവസ്ഥയിൽ എത്തിച്ച അരവിന്ദനെ വെറുതെ വിടാൻ അവൾ ഉദ്ദേശിച്ചിരുന്നില്ല. അയാളെ എങ്ങനെയെങ്കിലും കണ്ടെത്തണം. അയാൾ പറഞ്ഞിരുന്ന ബാങ്ക് ബ്രാഞ്ചിൽ ചെന്ന് ഏറെ കഷ്ടപ്പെട്ടാണ് അയാളുടെ യഥാർത്ഥ അഡ്രസ്സ് അവൾ സംഘടിപ്പിച്ചത്. അവിടെ എത്തിയപ്പോഴാണ് അരവിന്ദ് വിവാഹിതനാണെന്നും അയാൾക്കൊരു കുഞ്ഞുണ്ടെന്നുമുള്ള സത്യം ചിത്ര അറിയുന്നത്.
വിഷമവും ദേഷ്യവും കൊണ്ട് അവളുടെ ഉള്ളം പുകഞ്ഞു. തന്റെ ജീവിതം ഇത്രത്തോളം തകർത്തിട്ട് അരവിന്ദ് മാത്രം ഇവിടെ സന്തോഷത്തോടെ ജീവിക്കേണ്ട എന്നൊരു ഉറച്ച തീരുമാനം അവൾ എടുത്തു. അവൾ ആ വീടിന്റെ മുന്നിൽ കാത്തുനിന്നു. അരവിന്ദ് പുറത്തുപോയ സമയം നോക്കി അവൾ ഉള്ളിലേക്ക് കയറിച്ചെന്നു. അവിടെ കണ്ട സുന്ദരിയായ ആ യുവതിയോട്, അരവിന്ദിന്റെ ഭാര്യയോട് അവൾ എല്ലാ സത്യങ്ങളും തുറന്നു പറഞ്ഞു.
ആദ്യം അവർ വിശ്വസിച്ചില്ല. “എന്റെ അരവിന്ദേട്ടൻ അങ്ങനെയൊരാളല്ല, നിങ്ങൾ വെറുതെ കളവ് പറയുകയാണ്” എന്ന് പറഞ്ഞ് അവർ ചിത്രയെ ഇറക്കിവിടാൻ നോക്കി. ആ സമയത്താണ് അരവിന്ദ് അവിടേക്ക് വരുന്നത്.
ചിത്രയെ അവിടെ കണ്ടപ്പോൾ അയാളുടെ മുഖം വിവർണ്ണമായി. അയാൾ അവളെ ആട്ടിപ്പുറത്താക്കാൻ നോക്കി. തന്റെ സർവ്വ സ്വാധീനവും ഉപയോഗിച്ച് അവളെ അവിടെ നിന്ന് ഓടിക്കാനായിരുന്നു അയാളുടെ ശ്രമം.
”നീ ആരാണെന്ന് എനിക്കറിയില്ല, ഇറങ്ങിപ്പോ ഇവിടുന്ന്!” അയാൾ അലറി.
പക്ഷേ, ചിത്ര തയ്യാറെടുപ്പോടെയാണ് വന്നത്. അരവിന്ദുമായി കഴിഞ്ഞ നിമിഷങ്ങളിൽ താൻ ഫോണിൽ പകർത്തിയിരുന്ന ചില സ്വകാര്യ നിമിഷങ്ങളും മെസ്സേജുകളും അവൾ തന്റെ ഫോണിൽ നിന്ന് എടുത്തു.
അത് ആ ഭാര്യയുടെ മുന്നിലേക്ക് നീട്ടി. ആ ദൃശ്യങ്ങൾ കണ്ടതോടെ ആ സ്ത്രീയുടെ ഉള്ളിലെ സകല വിശ്വാസവും തകർന്നു. സ്നേഹിച്ചിരുന്ന ഭർത്താവിൽ നിന്ന് ഇത്ര വലിയൊരു ചതി അവർ പ്രതീക്ഷിച്ചിരുന്നില്ല. താൻ ദൈവത്തെപ്പോലെ കണ്ട മനുഷ്യൻ എത്രമാത്രം ക്രൂരനാണെന്ന് അവർ തിരിച്ചറിഞ്ഞു.
അവിടെ വച്ച് തന്നെ ആ സ്ത്രീ തന്റെ കുഞ്ഞിനെയും എടുത്ത് ആ വീട്ടിൽ നിന്നും ഇറങ്ങി. “ഇത്രയും വൃത്തികെട്ട ഒരാളുടെ കൂടെ ഒരു നിമിഷം പോലും എനിക്ക് കഴിയാൻ പറ്റില്ല” എന്ന് പറഞ്ഞുകൊണ്ട് അവർ തന്റെ വീട്ടിലേക്ക് പോയി. അധികം വൈകാതെ തന്നെ അവർ അരവിന്ദിനെതിരെ ഡിവോഴ്സ് കേസ് ഫയൽ ചെയ്യുകയും ചെയ്തു.
അരവിന്ദിന്റെ അവസ്ഥ കഷ്ടത്തിലായി. നാട്ടിലും ജോലിസ്ഥലത്തും അയാൾക്ക് നാണക്കേടായി. ഒടുവിൽ ഗത്യന്തരമില്ലാതെ നാട്ടുകാർ ഇടപെട്ടു. ചിത്ര ഗർഭിണിയായതിനാൽ അയാളെക്കൊണ്ട് അവളെ വിവാഹം കഴിപ്പിക്കാൻ അവർ തീരുമാനിച്ചു. പക്ഷേ, അരവിന്ദിന്റെ ഉള്ളിൽ ചിത്രയോട് കൊടും പകയായിരുന്നു. തന്റെ സമാധാനമായിരുന്ന കുടുംബജീവിതം തകർത്തവൾ എന്ന നിലയിലാണ് അയാൾ അവളെ കണ്ടത്.
നിർബന്ധത്തിന് വഴങ്ങി അവളെ തന്റെ വീട്ടിലേക്ക് കയറ്റിയെങ്കിലും അയാളുടെ ജീവിതം ആകെ താറുമാറായിരുന്നു.
അരവിന്ദ് ഒരു മുഴുക്കുടിയനായി മാറി. ജോലിക്ക് പോകാൻ മടിയായി. എപ്പോഴും മദ്യപിച്ചു വന്ന് അയാൾ ചിത്രയെ ഉപദ്രവിക്കാൻ തുടങ്ങി.
“നിന്നെക്കൊണ്ടാണ് എന്റെ ജീവിതം നശിച്ചത്” എന്ന് അലറിക്കൊണ്ട് അയാൾ അവളെ നിരന്തരം മർദ്ദിച്ചു. ആ വീട് അവൾക്കൊരു നരകമായി മാറി. ഒരു ദിവസം മദ്യപിച്ചു ലക്കുകെട്ട അയാൾ അവളെ ക്രൂരമായി ചവിട്ടുകയും മർദ്ദിക്കുകയും ചെയ്തു. ആ ക്രൂരതയിൽ അവളുടെ വയറ്റിലുണ്ടായിരുന്ന ആ കുഞ്ഞ് ഇല്ലാതായി. അബോർഷൻ സംഭവിച്ചു.
തന്റെ കുഞ്ഞിനെ കൂടി ഇല്ലാതാക്കിയ അരവിന്ദനോട് ചിത്രയ്ക്ക് ഇനി സഹതാപമില്ലായിരുന്നു. അവൾ ധൈര്യം സംഭരിച്ച് പോലീസിൽ പരാതി നൽകി. മർദ്ദനത്തിന്റെയും ഗർഭം അലസലിന്റെയും തെളിവുകൾ സഹിതം അവൾ കേസ് കൊടുത്തു. പോലീസ് അരവിന്ദിനെ അറസ്റ്റ് ചെയ്ത് ജയിലിലാക്കി.
എല്ലാം കഴിഞ്ഞ് ചിത്ര പുറത്തേക്ക് വരുമ്പോൾ അവളുടെ മുന്നിൽ ശൂന്യമായ ഒരു ലോകമായിരുന്നു. പോകാൻ ഒരിടമില്ല. അച്ഛനും അമ്മയും പഴയത് പോലെ അവളെ സ്വീകരിക്കില്ലെന്ന് അവൾക്കറിയാമായിരുന്നു.
എങ്കിലും അവൾ തളർന്നില്ല. താൻ ജീവിതത്തിൽ ചെയ്തുപോയ തെറ്റുകൾക്ക് എങ്ങനെയെങ്കിലും പ്രായശ്ചിത്തം ചെയ്യണം എന്ന് അവൾ ആഗ്രഹിച്ചു. തന്റെ അശ്രദ്ധയും ഒരൊറ്റ നിമിഷത്തെ വികാരവും കാരണം എത്രയോ പേരുടെ ജീവിതം തകർന്നു.
അലഞ്ഞുതിരിയുന്നതിനിടയിലാണ് കുറെ അനാഥ കുഞ്ഞുങ്ങളെ പാർപ്പിച്ചിരുന്ന ഒരു ആശ്രമത്തെക്കുറിച്ച് അവൾ അറിയുന്നത്. അവിടെ ഒരു ജോലിക്കായി അവൾ അപേക്ഷിച്ചു. തന്റെ ജീവിതകഥ സത്യസന്ധമായി അവൾ അവിടെയുള്ള അധികൃതരോട് പറഞ്ഞു. അവർക്ക് അവളുടെ അവസ്ഥ മനസ്സിലായി. അവൾക്ക് അവിടെ ജോലി ലഭിച്ചു.
ഇന്ന് ചിത്ര ആ പഴയ ചിത്രയല്ല. അവൾ ആ അനാഥ കുഞ്ഞുങ്ങളുടെ അമ്മയാണ്. അവർക്ക് ഭക്ഷണം നൽകിയും, അവരെ ഉറക്കിയും, അവരുടെ കൊച്ചു കൊച്ചു സങ്കടങ്ങൾ കേട്ടും അവൾ തന്റെ ജീവിതത്തിന് പുതിയൊരു അർത്ഥം കണ്ടെത്തുകയാണ്.
തനിക്കുണ്ടാവേണ്ടിയിരുന്ന കുഞ്ഞിന് നൽകാൻ കരുതിവച്ച സ്നേഹം മുഴുവൻ അവൾ ആ കുഞ്ഞുങ്ങൾക്കായി നൽകി. ചെയ്തുപോയ പാപത്തിന് പരിഹാരമായി അവൾ ആ കുഞ്ഞുങ്ങളെ തന്റെ സ്വന്തം മക്കളെപ്പോലെ നോക്കി വളർത്തുന്നു. അവളുടെ മനസ്സിന് ഇപ്പോൾ ശാന്തിയുണ്ട്. കടന്നുപോയ വഴികൾ ദുർഘടമായിരുന്നുവെങ്കിലും, ഇപ്പോൾ അവൾ ഒരു നല്ല ലക്ഷ്യത്തിന് വേണ്ടിയാണ് ജീവിക്കുന്നത്. ആ അനാഥാലയത്തിലെ ഓരോ കുഞ്ഞിന്റെയും ചിരിയിൽ അവൾ തന്റെ കുഞ്ഞിന്റെ മുഖം കാണുന്നു.
സ്റ്റോറി by ചന്ദ്ര
